كثرة الهم ........ تضحك

و اخيرا جاء الفرج او نصفه ...لا يهم ما دمت سوف أودع هذا المكان ...وداعا ابديا ...سامحيني لم استطع ان احبك رغم معالمك الجغرافية القروية الجميلة, و هوائك النقي البارد الجميل في نهار صيفي ...سامحيني فمهما كثرت محاسنك لا استطيع ان احب مكانا أبعدني عن أسرتي و حملني على ذرف دموع الاشتياق لهم.
ها انا اليوم أجمع حاجياتي بكل خفة و نشاط و أقرص نفسي بين الحين و الآخر لاتأكد من أني لا أحلم.
و كان من بين الأشياء التي علي فعلها قبل المغادرة أن اتوجه الى المكتب الوطني للماء الصالح للشرب كي افسخ عقدة الاشتراك و هنا دار الحديث التالي.
انا: السلام عليكم , كيداير أخاي لاباس
التقني : و عليكم السلام لاباس الحمد لله ياكما شي مشكل فالما؟
انا: لا الحمد لله انا جيت على ود ديك الكونترا ديال الما باش نحيدها من على سميتي صافي جا الفرج اوغادي ننتقل من هنا .
التقني : ايوا على سلامتك , نتوما ناس ديال الصحة عندكوم الانتقال ساهل ماشي بحال التعليم مساكن .
استفزني بهاته المقارنة اللا منطقية و التي لا تمت للواقع بصلة و لا تميزنا بأي افضلية عن هذا القطاع بل نحن في الهوا سوا .
أنا : ياودي شمن ساهل و شمن صعيب ايلا جينا نقارنو واهلي فين غانوصلوا , يا ريت لكان حتا حنا فحالهم نخدموا نص نهار و منين نمشيو لديورنا نمشيوا مرتاحين مكاينش اللي يدق علينا فنصاصات الليل دقان كيطيرليك القلب ديالك من بلاصتو و نهار نبغي كونجي منتقاتلش عليه معا خويا فالحرفة و نرغب و نزاوك باش تتعطالي ابسط حقوقي و تكون مرضي الوالدين سمحلي بغيت نقول مرضي الطبيب عاد تخرج لحقاش حنا عندنا سياسات تصفاوية ايلا كنتي كادير القانون ديالك و كترفض تكون منفذ للمهام السلطوية و مكتبغيش تصغر راسك كيما نصحني واحد االمرة االمندوب و قالي خاص ايكون راسك صغير هههه مغاديش تشد الكونجي ديالك . فاكيفاش كتقارن زوج حوايج مكايتقارنوش.
أجابني بنظرة المتعجب المتشكك و قال : الله يصاوب الامور و صاف حتى واحد ما راه مهني .
ثم أردف قائلا و هو يبحث بين كومة أوراق تراصت بعشوائية : راحنا ما زال مرونين راكي عارفة يالله تحل المكتب و باقي مجابوا البرصونيل ..هاه....هاهي راه نيت دزت لعندكوم نهار ثالث عيد و ماكان حد واش مكايبقا حد برمانونص؟
اعطاني الورقة كي املا الفراغ بما يناسب , أجبته : و اش كاين شي حد تايبقى نهار العيد و فمركز صحي ماشي حتى سبيطار ويخلي الاجواء السعيدة مع الفاميلة و الحباب و لوكان بغات الوزارة يبقاليها شي حد برمانونص مغاديش تسيفط بنت فاس للحسيمة و بنت الحسيمة لزاكورة و ولد زاكورة لكازا وزيد وزيد.
أجابني بامتعاض : و لكن راه خص يبقا شي حد نورمالمو كتشدوا التعويض على العيد .
هنا كما يقولون صب الزيت على النار بكلماته . و نهض الجمل اللي كل مرة كنخليوه راكد وجاوبو:
اشمن تعويض اسي ؟؟
التقني : ياك كيعطيوكم الف درهم كتعويض على العيد (للاشارة فقط التقنين العاملين بهدا المكتب يتقاضى اصغرهم درجة ما يساوي 5000 درهم تعويض على العيد و الاجرة الشهرية 9000 درهم لم اكن لاثق بهكذا معلومة لو لم يكن هناك فرد من العاائلة يشغر نفس المنصب و مستواه الدراسي لم يتجاوز الاعدادية ) .
أنا : كيفاش ؟ فين هادشي فين ؟ و شكون هادو؟ للحظة ظننت انه يتحدث عن دولة اوروبية او خليجية.
حنا كانشدوا 1000 درهم تعويض هههههههههههه......هههه....سمحلي و لكن ...هههههه....ههههه واش شي نكتة هادي جديدة على الممرضين .....ههههه..و الله حتى زوينة .
التقني : الله يهديك راني كندوي بالمعقول.
انا( محاولة اخفاء حزني و فقصتي ) : الله يا ودي شكون كدب عليك؟ عرفتي شحال التعويض على الليل و الويكند و العطل و الاعياد ........69 درهم .....و دون ان اترك له مجالا لتقبل الصدمة ....و نزيدك 30 فالمئة كتديها الضريبة و 20 فالمئة كيديوها العفاريت و التماسيح( ايف يو نو وات اي مين) ايوا كتبقاليك 34.5 درهم كتحطها فالبنك لي حتا هي كاتدي حقها فكيفاش بغيتي ايكلس هنا شي حد و انا اقل حاجة كنخسرها باش نسافر لدارنا هي 600 درهم .
فالله يخليك متبقاوش تدويو فشي حوايج معارفينهومش و تطلقوا علينا احكام مسبقة و خليونا سارطين همنا و ساكتين و دايرين عقلنا .
خرجت من مكتبه بضحكة ففمي و دمعتان وكيما قالوا سيادنا اللوالا كثرة الهم تتضحك......
بقلمي ايمان اعــــراب..